அன்பானவர்களே கடந்த நிகழ்ச்சியில் நாம் ஆதியாகமம் 46 ஆம் அதிகாரம் 28 வது வசனம் வரைக்கும் கற்றுக் கொண்டோம்.

இன்று ஆதியாகமம் 46 29 ஆம் வசனம் முதல் பார்ப்போம்.

வாசிக்கிறேன் ஆதியாகமம் 46:29

’29யோசேப்பு தன் இரதத்தை ஆயத்தப்படுத்தி, அதின்மேல் ஏறி, தன் தகப்பனாகிய இஸ்ரவேலைச் சந்திக்கும்படி போய், அவனைக் கண்டு, அவனுடைய கழுத்தைக் கட்டிக்கொண்டு, வெகுநேரம் அவன் கழுத்தை விடாமல் அழுதான். ‘
……………………..
யோசேப்பு தன் தந்தையைக் கட்டிப்பிடித்துக்கொண்டு அழுதார். அவர் நெடுநேரம் அங்கேயே அழுதுகொண்டிருந்ததாக வேதம் சொல்கிறது. அந்த “வெகுநேரம் ” என்பது எவ்வளவு காலம் என்று நமக்குத் தெரியாது, அங்கு வெளிப்பட்ட உணர்ச்சிகள் மிகவும் உண்மையானவை. ஆம் அது எவ்வளவு அற்புதமான ஒரு சந்திப்பு!

ஆதியாகமம் 46:30

’30அப்பொழுது இஸ்ரவேல் யோசேப்பைப் பார்த்து: நீ இன்னும் உயிரோடிருக்கிறாயே, நான் உன் முகத்தைக் கண்டேன், எனக்கு இப்போது மரணம் வந்தாலும் வரட்டும் என்றான். ‘
…………………….

இது முதியவரான யாக்கோபுக்கு எவ்வளவு பெரிய ஒரு சந்தோஷம்! இல்லையா?? உண்மையைச் சொன்னால் இவர் மரணத்திற்கு அருகில் இருந்தார். அவர் மிகவும் சிரமப்பட்டுத்தான் இந்தப் பயணத்தை மேற்கொண்டிருப்பார், ஆனால் தேவன் அவரைத் தாங்கினார். அவர் இன்னும் சில ஆண்டுகள் எகிப்து தேசத்தில் உயிர்வாழ அனுமதிக்கப்பட்டதையும் நாம் பார்க்கிறோம்.
இப்போது யாக்கோபு “விசுவாசத்தால் வாழும் தேவனுடைய பிள்ளை” என்பதை கவனிக்க வேண்டும். அதனால்தான், அவர் ‘இஸ்ரவேல்’ என்று இப்பொழுது அழைக்கப்படுகிறார்.

ஆதியாகமம் 46:31-34
’31பின்பு, யோசேப்பு தன் சகோதரரையும் தன் தகப்பனுடைய குடும்பத்தாரையும் நோக்கி: நான் பார்வோனிடத்துக்குப் போய், கானான் தேசத்திலிருந்து என் சகோதரரும் என் தகப்பன் குடும்பத்தாரும் என்னிடத்தில் வந்திருக்கிறார்கள். 32அவர்கள் மேய்ப்பர்கள், ஆடுமாடுகளை மேய்க்கிறது அவர்கள் தொழில்; அவர்கள் தங்கள் ஆடுமாடுகளையும் தங்களுக்கு உண்டான எல்லாவற்றையும் கொண்டுவந்தார்கள் என்று அவருக்குச் சொல்லுகிறேன். 33பார்வோன் உங்களை அழைத்து, உங்கள் தொழில் என்ன என்று கேட்டால், 34நீங்கள், கோசேன் நாட்டிலே குடியிருக்கும்படி, அவனை நோக்கி: எங்கள் பிதாக்களைப்போல, உமது அடியாராகிய நாங்களும் எங்கள் சிறுவயதுமுதல் இதுவரைக்கும் மேய்ப்பர்களாயிருக்கிறோம் என்று சொல்லுங்கள்; மேய்ப்பர்கள் எல்லாரும் எகிப்தியருக்கு அருவருப்பாயிருக்கிறார்கள் என்றான்.’
………………….

வேதத்தில் மேய்ப்பர்களைப் பற்றி இவ்வளவு அதிகமாகக் கூறப்பட்டிருப்பது மிகவும் சுவாரஸ்யமானது. இவர்கள் தங்களுக்குச் சொந்தமான ஆடுகளை வளர்க்கும் மேய்ப்பர்களாக இருந்தார்கள்; இன்றும் இஸ்ரவேல் தேசத்தில் அப்படியே இருக்கிறார்கள். நம்முடைய ஆண்டவரை விவரிக்கப் பயன்படுத்தப்படும் ஒரு உருவகம் தான் “மேய்ப்பன்”. அவர் ஆடுகளுக்காகத் தன் உயிரைக் கொடுத்த நல்ல மேய்ப்பன். இன்று ஆடுகளைப் பாதுகாத்து வழிநடத்தும் பெரிய மேய்ப்பன். அவர் இனிமேல் வரப்போகும் பிரதான மேய்ப்பன். அவரே தன்னை மேய்ப்பன் என்று அழைத்துக் கொள்கிறார்.
ஆனால் அருமையானவர்களே, இந்த உலகம் அவரை ஒரு அருவருப்பாகவே பார்க்கிறது. இன்று இயேசு கிறிஸ்து உலகத்தால் ஏற்றுக்கொள்ளப் படவில்லை. ஆனால் அதே நேரம் “லிபரலிசம்” அல்லது (தாராளமயக் கொள்கையானது இந்த உலகம் ஏற்றுக்கொள்ளும் வகையில் ஒரு போலி இயேசுவை உருவாக்கியிருக்கிறது. அவர்கள் பரிசுத்த வேதத்தில் உள்ள இயேசுவைப் போல் அல்லாமல், ஒரு சிலையைப் போன்ற ஒரு உருவத்தை உருவாக்கியிருக்கிறார்கள். அவர்கள் சொல்லும் அந்த நபர் கன்னி மரியாளிடம் பிறந்தவர் அல்ல; அவர் அற்புதங்களைச் செய்ததில்லை; உலகத்தின் பாவங்களுக்காக அவர் சிலுவையில் மரிக்கவில்லை; அவர் உடலோடு உயிர்த்தெழவும் இல்லை. ஆனால் அப்படிப்பட்ட ஒரு இயேசு வாழவே இல்லை. அப்படி ஒருவரைப் பற்றி எந்த வரலாற்றுப் பதிவும் கிடையாது.
வரலாற்றுப் பதிவுகளில் உள்ள ஒரே இயேசு: கன்னி மரியாளிடம் பிறந்தவர், அற்புதங்களைச் செய்தவர், உலகத்தின் பாவங்களுக்காக மரித்தவர் மற்றும் கல்லறையிலிருந்து உடலோடு உயிர்த்தெழுந்தவர். இந்த மேய்ப்பனைத்தான் உலகத்திற்குப் பிடிப்பதில்லை. அவர் இன்றும் உலகிற்கு அருவருப்பாகவே இருக்கிறார்.
எகிப்தியர்களுக்கு மேய்ப்பர்கள் என்றாலே அருவருப்பாக இருந்தது. எனவே, யோசேப்பு தன் சகோதரர்களிடம், “பார்வோனிடம் நாம் மேய்ப்பர்கள் என்றும், கால்நடைகளை வளர்ப்பவர்கள் என்றும் சொல்லுங்கள்” என்று கூறுகிறார். உண்மையில், அவர்களிடம் ஆடுகளும் மாடுகளும் இருந்தன. பின்னர், பார்வோன் அவர்களுக்குக் ‘கோசேன்’ நாட்டை கொடுப்பதையும், தன் ஆடுகளைப் பராமரிக்க அவர்களைக் கேட்டுக்கொள்வதையும் நாம் பார்க்கிறோம். இதன் மூலம், இஸ்ரவேல் புத்திரர் எகிப்து தேசத்தின் மேய்ப்பர்களாக மாறினார்கள்.
இப்போது யாக்கோபின் குடும்பத்தினர் கோசேன் நாட்டில் வசிப்பதைப் பார்ப்பது மிகவும் ஆச்சரியமாக இருக்கிறது. எகிப்து நீண்ட காலத்திற்கு வாழப் போகும் ஒரு இடமாக இருக்கப் போகிறது. யோசேப்பின் மரணத்திற்குப் பிறகு, அவர்கள் எகிப்து தேசத்தில் அடிமைகளாக மாறுவார்கள்; ஆனாலும் அந்த காலம் முழுவதும் தேவன் அவர்களுடனேயே இருப்பார். அங்கே அவர்கள் ஒரு பெரிய தேசமாக உருவெடுப்பார்கள், பின்னர் தேவன் அவர்களை மோசேயின் தலைமையில் அங்கிருந்து வெளியே அழைத்து வருவார்.
தேவன் யோசேப்புக்கு நேரடியாகத் தரிசனமாகிப் பேசினார் என்பதற்கு எந்தப் பதிவும் இல்லை, ஆனாலும் யோசேப்பின் வாழ்க்கையில் தேவனுடைய பராமரிப்பை (Providence) நாம் தெளிவாகக் காண முடிகிறது. யாக்கோபின் முழுக் குடும்பமும் எகிப்து தேசத்தில் தப்பிப்பிழைப்பதற்காக, யோசேப்பு முன்னதாகவே வந்து வழியை ஆயத்தம் செய்ய வேண்டியிருந்தது என்பது இப்போது நமக்குத் தெளிவாகப் புரிகிறது.

தொடர்ந்து 47 ஆம் அதிகாரத்தில் இருந்தும் சில வசனங்களை பார்ப்போம்.

யாக்கோபும் அவரது குடும்பத்தினரும் எகிப்து தேசத்திற்கு வந்து சேர்ந்ததை நாம் பார்த்தோம். யோசேப்பு ஒரு சாதுர்யமான திட்டத்தின்படி அவர்களை கோசேன் நாட்டிற்கு அழைத்து வந்தார். அந்த காலத்தில் அதுதான் மிகவும் செழிப்பான நிலப்பகுதியாக இருந்தது; ஆனால், இப்போது ஒரு பெரிய பஞ்சம் நிலவுவதால், நிலத்தின் உரிமையாளர்களுக்கு எந்த நிலமும் பெரிய மதிப்பைத் தருவதாக இல்லை.
யாக்கோபின் வாழ்க்கையைக் குறித்து இதுவரை நாம் பார்த்ததிலேயே இதுதான் மிகச் சிறந்த பகுதியாக அமையப்போகிறது. அவர் எகிப்துக்குப் பயணம் மேற்கொள்ளும் வரை, அவர் ஒரு விசுவாசமுள்ள மனிதராக மாறியதை நம்மால் பார்க்க முடிவதில்லை. மற்ற எல்லா அதிகாரங்களையும் விட, இந்த அதிகாரம் அதை நமக்குத் தெளிவாக வெளிப்படுத்துகிறது.
பஞ்சம் முடிவுக்கு வரும் நேரத்தில் அதன் தீவிரம் இன்னும் அதிகமாகிறது. உலக மக்கள் அனைவரும் இதில் பாதிக்கப்பட்டிருந்தாலும், வேதத்தின் சரித்திரத்திற்கு முக்கிய இடங்கள் என்பதால் கானான் மற்றும் எகிப்து தேசங்கள் மட்டுமே இங்கே குறிப்பிடப்பட்டுள்ளன.
ஆதியாகமம் 47:1
‘1யோசேப்பு பார்வோனிடத்தில் போய்: என் தகப்பனும் என் சகோதரரும், தங்கள் ஆடுமாடுகளோடும் தங்களுக்கு உண்டான எல்லாவற்றோடுங்கூடக் கானான் தேசத்திலிருந்து வந்தார்கள்; இப்பொழுது கோசேன் நாட்டில் இருக்கிறார்கள் என்று சொல்லி; ‘
…………………..

யோசேப்பு தன் தந்தையையும் சகோதரர்களையும் எகிப்தின் பார்வோனுக்கு முன்பாக அறிமுகப்படுத்தப் போகிறார். அவர்களுக்கு ஒரு இடத்தைக் கேட்பதற்கு முன்பாகவே, அவர் அவர்களைக் கோசேன் நாட்டில் தங்க வைத்தார். இதில் உள்ள ஒரு சாதுர்யமான திட்டத்தை (Strategy) உங்களால் பார்க்கமுடியும்.
அவர்கள் ஏற்கனவே அங்கே தங்கியிருந்தால், அந்த நிலத்தையே அவர்களுக்கு வழங்க பார்வோன் எளிதாகச் சம்மதிப்பார். எல்லாவற்றிற்கும் மேலாக, அவர்கள் ஏற்கனவே அங்கே குடிபுகுந்து, தங்கள் உடைமைகளை இறக்கி வைத்திருப்பார்கள் என்பதால் அந்த இடத்தை அப்படியே அவர்களுக்குக் கொடுத்துவிடுவது பார்வோனுக்கு எளிதாக இருக்கும்.
ஆதியாகமம் 47:2ஆம் -3ஆம் வசனங்களைப் பாருங்கள்.
‘2தன் சகோதரரில் ஐந்துபேரைப் பார்வோனுக்கு முன்பாகக் கொண்டுபோய் நிறுத்தினான். 3பார்வோன் அவனுடைய சகோதரரை நோக்கி: உங்கள் தொழில் என்ன என்று கேட்டான்; அதற்கு அவர்கள்: உமது அடியாராகிய நாங்களும் எங்கள் பிதாக்களும் மந்தை மேய்க்கிறவர்கள் என்று பார்வோனிடத்தில் சொன்னதுமன்றி, ‘
……………………
அந்தக் காலத்தில் ஆடு மேய்ப்பவர்களுக்கும், மாடு வளர்ப்பவர்களுக்கும் இடையே சுமுகமான உறவு இருக்கவில்லை என்பதை நாம் பார்த்தோம். எகிப்தியர்களுக்கு மேய்ப்பர்களைப் பிடிக்காது, அதேபோல் ஆடு மேய்க்கும் தொழிலையும் அவர்கள் விரும்பவில்லை.
இது இஸ்ரவேல் புத்திரர்களுக்கு ஒரு நல்ல வாய்ப்பாக அமைந்தது; அதாவது, எகிப்தியர்கள் செய்ய விரும்பாத ஒரு தொழிலைச் செய்து, அங்கேயே தங்குவதற்கு அவர்களுக்கு ஒரு வழி பிறந்தது.
ஆதியாகமம் 47:4-6 வரை வாசிக்கிறேன்.

‘4கானான் தேசத்திலே பஞ்சம் கொடிதாயிருக்கிறது; உமது அடியாரின் மந்தைகளுக்கு மேய்ச்சல் இல்லாமையால், இத்தேசத்திலே தங்கவந்தோம்; உமது அடியாராகிய நாங்கள் கோசேன் நாட்டிலே குடியிருக்கும்படி தயவுசெய்யவேண்டும் என்று வேண்டிக்கொண்டார்கள். 5அப்பொழுது பார்வோன் யோசேப்பை நோக்கி: உன் தகப்பனும் உன் சகோதரரும் உன்னிடத்தில் வந்திருக்கிறார்களே. 6எகிப்துதேசம் உனக்கு முன்பாக இருக்கிறது; தேசத்திலுள்ள நல்ல இடத்திலே உன் தகப்பனையும் உன் சகோதரரையும் குடியேறும்படி செய்; அவர்கள் கோசேன் நாட்டிலே குடியிருக்கலாம்; அவர்களுக்குள்ளே திறமையுள்ளவர்கள் உண்டென்று உனக்குத் தெரிந்திருந்தால், அவர்களை என் ஆடுமாடுகளை விசாரிக்கிறதற்குத் தலைவராக வைக்கலாம் என்றான். ‘
……………………….
எகிப்தியர்களிடையே ஆடு மேய்க்கும் தொழில் பிரபலமாக இல்லாததால், பார்வோன் தனது கால்நடைகளைப் பராமரிக்க யாராவது ஒருவரைத் தேடிக்கொண்டிருந்தார்.
இப்போது யோசேப்பு தனது சொந்தத் தந்தையை பார்வோனுக்கு அறிமுகப்படுத்துகிறார். இது உண்மையிலேயே மிகவும் வியக்கத்தக்க ஒரு நிகழ்வு. நாம் யாக்கோபைப் பற்றிப் படிக்கும்போது, இதுவரை பார்த்ததிலேயே மிகச்சிறந்த மற்றும் கண்ணியமான நிலையில் அவர் இப்போது இருப்பதை நீங்கள் கவனிக்க வேண்டும்.
ஆதியாகமம் 47:7
‘7பின்பு, யோசேப்பு தன் தகப்பனாகிய யாக்கோபை அழைத்துக்கொண்டுவந்து, அவனைப் பார்வோனுக்கு முன்பாக நிறுத்தினான். யாக்கோபு பார்வோனை ஆசீர்வதித்தான். ‘
……………………..

யாக்கோபு இப்போது பார்வோனை ஆசீர்வதிப்பதைக் கவனியுங்கள். அவர் தனது பெயருக்கு (இஸ்ரவேல்) ஏற்றவாறு வாழத் தொடங்கியிருக்கிறார். அவர் இப்போது தேவனுக்கான ஒரு சாட்சியாக நிற்கிறார். பொதுவாக, சிறியவர் பெரியவரிடம் ஆசி பெறுவதே முறை; ஆனால் இங்கே, யாக்கோபு தேவனுடைய சாட்சியாக நின்று பார்வோனை ஆசீர்வதிக்கிறார்.

ஆதியாகமம் 47:8

‘8பார்வோன் யாக்கோபை நோக்கி: உமக்கு வயது என்ன என்று கேட்டான். ‘
………………….
பார்வோனின் முன்னிலையில் யாக்கோபு பழைய சுபாவத்துடன் இருந்திருந்தால், அவர் பேசிய விதம் முற்றிலும் வேறாக இருந்திருக்கும். “பார்வோனே, எனக்கு 130 வயதாகிறது; என் வாழ்க்கையில் நான் சாதித்தவை ஏராளம். இளமையில் என் சகோதரனை எப்படித் தந்திரமாக வென்றேன், என் மாமனாரை மிஞ்சி எப்படி பெரும் செல்வந்தன் ஆனேன் என்று பாருங்கள்” என்று தற்பெருமை பேசியிருக்கலாம். “எனக்கு பன்னிரண்டு மகன்கள் இருக்கிறார்கள்” என்று தன் குடும்பத்தைப் பற்றியும் அவர் பெருமையாகப் பேசியிருக்க வாய்ப்புண்டு.
ஆனால், இப்போது யாக்கோபு முற்றிலும் மாறுபட்ட ஒரு மனிதர். இப்போது அவர் என்ன சொல்லுகிறார் என்றுகவனியுங்கள்:

ஆதியாகமம் 47:9

‘9அதற்கு யாக்கோபு: நான் பரதேசியாய்ச் சஞ்சரித்த நாட்கள் நூற்றுமுப்பது வருஷம்; என் ஆயுசு நாட்கள் கொஞ்சமும் சஞ்சலமுள்ளதுமாயிருக்கிறது; அவைகள் பரதேசிகளாய்ச் சஞ்சரித்த என் பிதாக்களுடைய ஆயுசு நாட்களுக்கு வந்து எட்டவில்லை என்று பார்வோனுடனே சொன்னான். ‘
……………………….

முதலாவதாக, யாக்கோபு எகிப்து தேசத்திற்கு வந்தபோது அவருக்கு 130 வயது என்பதை கவனியுங்கள்; அவர் இறக்கும் போது அவருக்கு 147 வயதாக இருக்கும். எனவே, அவர் எகிப்தில் 17 ஆண்டுகளைக் கழிப்பார். அவர் எகிப்திற்கு வந்தபோது மரணத்தின் விளிம்பில் இருந்திருப்பார் என்று நான் நினைக்கிறேன்—அதாவது ஒரு கால் கல்லறையிலும், மறு கால் வாழைப்பழத் தோலிலும் – மிகவும் தள்ளாடிய நிலையில் – இருந்தது போன்ற ஒரு நிலை. ஆனால், யோசேப்பு உயிரோடு இருப்பதைக் கண்ட மகிழ்ச்சியும், அவரோடு எகிப்தில் இருந்ததும் அவரது ஆயுளை 17 ஆண்டுகள் நீட்டித்தன.
பார்வோனைச் சந்திக்கும் இந்தத் தருணம் அந்த முதியவர் (யாக்கோபு) தன்னைப்பற்றிப் பெருமையாகப் பேச ஒரு சிறந்த வாய்ப்புதான். ஆனால், யாக்கோபு எவ்வளவு மாறியிருக்கிறார் என்பதைப் பாருங்கள்! தனக்கு 130 வயதாகிறது என்றும், தனது வாழ்க்கையில் பெருமைப்பட்டுக்கொள்ளும் அளவுக்கு ஒன்றும் இல்லை என்றும் அவர் கூறுகிறார். “என் ஆயுசுநாட்கள் கொஞ்சமும் தீமையுமானவைகள்” என்று சொல்கிறார்.
தன் முதிய தந்தையை ஏமாற்றிய தந்திரத்தைப் பற்றி அவர் இங்கே பெருமையடிக்கவில்லை. அதற்குப் பதிலாக, தான் தன் முன்னோர்களுக்கு நிகரானவர் அல்ல என்றே கூறுகிறார். “என் பிதாக்கள் தங்கள் பரதேசிப் பிரயாணத்தில் வாழ்ந்த நாட்களுக்கு என் ஆயுசுநாட்கள் எட்டவில்லை” என்கிறார். இது பழைய யாக்கோபைப் போலத் தெரியவில்லை, அல்லவா? முற்றிலும் மாறிய ஒரு மனிதனாக தெரிகிறார்?அவர் தனது வாழ்க்கையைத் தேவனுடைய மகிமைக்கே அர்ப்பணிக்கிறார்; தான் எதோ பெரிய காரியங்களைச் சாதித்துவிட்டதாக அவர் தற்பெருமை பேசவே இல்லை.
ஆதியாகமம் 47:10
’10பின்னும் யாக்கோபு பார்வோனை ஆசீர்வதித்து, அவன் சமுகத்தினின்று புறப்பட்டுப்போனான். ‘
………………………
உண்மையைச் சொல்லப்போனால், யாக்கோபு அங்கே வந்து சேர்ந்ததையே நான் பெரிய விஷயமாக சொல்லலாம். தனக்குத்தானே பெருமை பேசிக்கொள்ள அவருக்கு எவ்வளவு பெரிய வாய்ப்பு கிடைத்தது, ஆனால் அவர் அதைப் பயன்படுத்தவில்லை. முற்காலமாக இருந்திருந்தால், “பார்வோன் ஒரு பெரிய மன்னராக இருக்கலாம், ஆனால் கானான் தேசத்தில் தானும் ஒரு பெரிய ஆளாகத்தான் இருந்தேன் என்பது அவருக்குத் தெரிய வேண்டாமா?” என்று நினைத்திருப்பார்.
ஆனால் யாக்கோபு இப்பொழுது தற்பெருமை பேசவில்லை—அவர் தன்னை ஒரு சாதாரணப் பாவியாகவும், கடவுளின் கிருபையால் இரட்சிக்கப்பட்டவராகவும் மட்டுமே கருதுகிறார்.
இன்று பலர் தங்களைப் பற்றிப் பெருமையாகப் பேசுவதை நாம் அதிகம் கேட்கிறோம். சில நேரங்களில் நம்முடைய வட்டாரங்களிலேயே, சிலர் செய்த காரியங்களுக்காக அவர்களைப் புகழ்ந்து தள்ளுகிறோம். உண்மையைச் சொல்வதென்றால், நாம் அனைவருமே பாவிகள் தான். இத்தனை ஆண்டுகளாக நம்மிடம் அன்பாகவும், பொறுமையாகவும் இருந்த அந்த அற்புதமான இரட்சகரைப் (இயேசு) பற்றிப் பெருமைப்படுவதைத் தவிர, நம்மிடம் தற்பெருமை பேச எதுவுமே இல்லை. நாம் அனைவரும் பெருமைப்படக் கூடிய ஒரே விஷயம் அவர் மட்டும்தான். அதே நேரம் , நம் முன்னோர்களை விட நாம் சிறந்தவர்கள் என்றும் நாம் சொல்லிவிட முடியாது.
ஆனால், இந்த இடத்தில் யாக்கோபு அப்படி நடந்து கொள்ளவில்லை. அவர் இப்போது முற்றிலும் மாற்றமடைந்த ஒரு மனிதராக இருப்பதால், தன்னைத் தாழ்த்தி மிகவும் எளிமையான இடத்தைப் பிடித்துக்கொள்கிறார்.
ஆதியாகமம் 47:11
’11பார்வோன் கட்டளையிட்டபடியே, யோசேப்பு தன் தகப்பனுக்கும் தன் சகோதரருக்கும் எகிப்துதேசத்திலே நல்ல நாடாகிய ராமசேஸ் என்னும் நாட்டிலே சுதந்திரம் கொடுத்து, அவர்களைக் குடியேற்றினான். ‘
……………………
ராம்சேஸ் நாடு என்பது கோசேன் நாடுதான்
ஆதியாகமம் 47:12-13
’12யோசேப்பு தன் தகப்பனையும் தன் சகோதரரையும் தன் தகப்பனுடைய குடும்பத்தார் அனைவரையும், அவரவர்கள் குடும்பத்திற்குத்தக்கதாய் ஆகாரம் கொடுத்து ஆதரித்துவந்தான். 13பஞ்சம் மிகவும் கொடிதாயிருந்தது; தேசமெங்கும் ஆகாரம் கிடையாமற்போயிற்று; எகிப்து தேசமும் கானான் தேசமும் பஞ்சத்தினாலே மெலிந்துபோயிற்று. ‘
………………………
இந்தக் கதையில் எகிப்தும் கானானும் மட்டுமே குறிப்பிடப்படுவதற்குக் காரணம், இந்த இரண்டு இடங்கள் மட்டுமே கதையோடு சம்பந்தப்பட்டிருக்கின்றன. யாக்கோபு தன் குடும்பத்துடன் கானான் தேசத்திலேயே தங்கியிருந்தால், அவர்கள் அனைவரும் அழிந்து போயிருப்பார்கள். எகிப்து தேசத்தில் தானியங்கள் சேமித்து வைக்கப்பட்டிருந்தன, ஆனால் அங்கேயும் இப்போது புதிதாகத் தானியம் விளையவில்லை.
எகிப்தின் விவசாயத்திற்கு நைல் நதி பொங்கி வழிவது மிகவும் அவசியம். ஆனால் அப்போது நைல் நதி பொங்கி வழியாததால், பஞ்சம் ஆப்பிரிக்கா முழுவதும் பரவியிருந்தது என்பது தெளிவாகத் தெரிகிறது.
ஆதியாகமம் 47:14
’14யோசேப்பு எகிப்துதேசத்திலும் கானான் தேசத்திலுமுள்ள பணத்தையெல்லாம் தானியம் கொண்டவர்களிடத்தில் வாங்கி, அதைப் பார்வோன் அரமனையிலே கொண்டுபோய்ச் சேர்த்தான். ‘
…………………..
இப்போது நாம் யோசேப்பு விமர்சிக்கப்படும் ஒரு விஷயத்தைப் பற்றிப் பார்க்கப் போகிறோம். மக்கள் பசியால் வாடியதைப் பயன்படுத்தி, அவர் நிலங்களையெல்லாம் விலைக்கு வாங்கிவிட்டதாகச் சிலர் கூறுகிறார்கள். அதாவது, அடமானத்தில் இருந்த நிலங்களை அவர் அபகரித்துக்கொண்டதாகச் சொல்கிறார்கள். ஆனால், யோசேப்பு மீதான இந்த விமர்சனம் நியாயமற்றது என்றே சொல்லலாம்.
முதலாவதாக, அவர் பார்வோனின் ஒரு பிரதிநிதியாக மட்டுமே செயல்பட்டார். அவர் செய்த எதுவும் அவருக்காக அல்ல; தன்னைத் தானே செல்வந்தராக்கிக் கொள்ள அவர் எந்த முயற்சியும் எடுக்கவில்லை. அவர் எந்த விதத்திலும் நேர்மையற்றவராக நடந்து கொள்ளவில்லை. இந்தப் பஞ்சத்தைப் பயன்படுத்தி அவர் தனிப்பட்ட முறையில் எந்த லாபமும் அடையவில்லை.
யோசேப்பு பார்வோனுக்காக நிலங்களை வாங்கினார், அதே சமயம் மக்களுக்குத் தேவையான உணவை வழங்கி அவர்கள் உயிர்வாழவும் உதவிசெய்தார். யோசேப்பு அந்தக்கால ‘தேவை மற்றும் விநியோகம்’ (Law of Supply and Demand) என்ற பொருளாதார விதிகளுக்கு உட்பட்டே செயல்பட்டார் என்று சொல்லலாம்.
ஆதியாகமம் 47:15-20
’15எகிப்துதேசத்திலும் கானான் தேசத்திலுமுள்ள பணம் செலவழிந்தபோது, எகிப்தியர் எல்லாரும் யோசேப்பினிடத்தில் வந்து: எங்களுக்கு ஆகாரம் தாரும்; பணம் இல்லை, அதினால் நாங்கள் உமது சமுகத்தில் சாகவேண்டுமோ என்றார்கள். 16அதற்கு யோசேப்பு: உங்களிடத்தில் பணம் இல்லாமற்போனால், உங்கள் ஆடுமாடுகளைக் கொடுங்கள்; அவைகளுக்குப் பதிலாக உங்களுக்குத் தானியம் கொடுக்கிறேன் என்றான். 17அவர்கள் தங்கள் ஆடுமாடு முதலானவைகளை யோசேப்பினிடத்தில் கொண்டுவந்தார்கள்; யோசேப்பு குதிரைகளையும் ஆடுகளையும் மாடுகளையும் கழுதைகளையும் வாங்கிக்கொண்டு, அந்த வருஷம் அவர்களுடைய ஆடுமாடு முதலான எல்லாவற்றிற்கும் பதிலாக அவர்களுக்கு ஆகாரம் கொடுத்து, அவர்களை ஆதரித்தான். 18அந்த வருஷம் முடிந்தபின், மறுவருஷத்திலே அவர்கள் அவனிடத்தில் வந்து: பணமும் செலவழிந்துபோயிற்று; எங்கள் ஆடுமாடு முதலானவைகளும் எங்கள் ஆண்டவனைச் சேர்ந்தது; எங்கள் சரீரமும் எங்கள் நிலமுமே ஒழிய, எங்கள் ஆண்டவனுக்கு முன்பாக மீதியானது ஒன்றும் இல்லை; இது எங்கள் ஆண்டவனுக்குத் தெரியாத காரியம் அல்ல. 19நாங்களும் எங்கள் நிலங்களும் உம்முடைய கண்களுக்கு முன்பாக அழிந்து போகலாமா? நீர் எங்களையும் எங்கள் நிலங்களையும் வாங்கிக்கொண்டு, ஆகாரம் கொடுக்கவேண்டும்; நாங்களும் எங்கள் நிலங்களும் பார்வோனுக்கு ஆதீனமாயிருப்போம்; நாங்கள் சாகாமல் உயிரோடிருக்கவும், நிலங்கள் பாழாய்ப் போகாமலிருக்கவும், எங்களுக்கு விதைத்தானியத்தைத் தாரும் என்றார்கள். 20அப்படியே எகிப்தியர் தங்களுக்குப் பஞ்சம் மேலிட்டபடியால் அவரவர் தங்கள் தங்கள் வயல் நிலங்களை விற்றார்கள்; யோசேப்பு எகிப்தின் நிலங்கள் யாவையும் பார்வோனுக்காகக் கொண்டான்; இவ்விதமாய் அந்தப் பூமி பார்வோனுடையதாயிற்று. ‘
…………………….
அந்தப் பஞ்சம் ஒரு பயங்கரமான விஷயமாக இருந்தது என்பதில் எந்தச் சந்தேகமும் இல்லை.
ஆதியாகமம் 47:21

’21மேலும் அவன் எகிப்தின் ஒரு எல்லைமுதல் மறு எல்லைவரைக்குமுள்ள ஜனங்களை அந்தந்தப் பட்டணங்களில் குடிமாறிப்போகப்பண்ணினான். ‘
……………………
தானியங்கள் சேமித்து வைக்கப்பட்டிருந்த இடங்களுக்கு அருகிலேயே இருப்பதற்காக, மக்கள் கூட்டம் கூட்டமாக நகரங்களை நோக்கி வரத் தொடங்கினர். யோசேப்பு ஆரம்பத்திலேயே எகிப்து முழுவதும் இதற்கான மையங்களைத் தேர்ந்தெடுத்து வைத்திருந்தது உங்களுக்கு நினைவிருக்கலாம். இப்போது மக்கள் உணவைப் பெறுவதற்கு வசதியாக, அந்த உணவு மையங்களுக்கு அருகிலேயே அவர்களை அவர் கொண்டு வருகிறார்.
ஆதியாகமம் 47:23-24
’23பின்னும் யோசேப்பு ஜனங்களை நோக்கி: இதோ, இன்று உங்களையும் உங்கள் நிலங்களையும் பார்வோனுக்காக வாங்கிக்கொண்டேன்; இதோ, உங்களுக்குக் கொடுக்கப்படுகிற விதைத் தானியம், இதை நிலத்தில் விதையுங்கள். 24விளைவில் ஐந்தில் ஒரு பங்கைப் பார்வோனுக்குக் கொடுக்கவேண்டும்; மற்ற நாலு பங்கும் வயலுக்கு விதையாகவும் உங்களுக்கும் உங்கள் குடும்பத்தாருக்கும் உங்கள் குழந்தைகளுக்கும் ஆகாரமாகவும் உங்களுடையதாயிருக்கட்டும் என்றான். ‘
…………………
அடுத்த ஆண்டோடு பஞ்சம் முடிவுக்கு வந்துவிடும் என்பதை யோசேப்பு அறிந்திருந்தார்; எனவே, மக்கள் தங்கள் நிலங்களில் தானியங்களை விதைக்கும்படி அவர் கூறுகிறார்.
ஆதியாகமம் 47:25-26
’25அப்பொழுது அவர்கள்: நீர் எங்கள் பிராணனைக் காப்பாற்றினீர்; எங்கள் ஆண்டவனுடைய கண்களில் எங்களுக்குத் தயவு கிடைக்கவேண்டும்; நாங்கள் பார்வோனுக்கு அடிமைகளாயிருக்கிறோம் என்றார்கள். 26ஐந்தில் ஒன்று பார்வோனுக்குச் சேரும் வாரம் என்று யோசேப்பு இட்ட கட்டளைப்படி எகிப்து தேசத்திலே இந்நாள்வரைக்கும் நடந்துவருகிறது; ஆசாரியரின் நிலம் மாத்திரம் பார்வோனைச் சேராமல் நீங்கலாயிருந்தது. ‘
………………………
மோசேயின் காலம் வரை யோசேப்பு இட்ட கட்டளைப்படி எகிப்து தேசத்திலே நடந்து வந்திருக்கிறது;
ஆதியாகமம் 47:27-31
’27 இஸ்ரவேலர் எகிப்து தேசத்திலுள்ள கோசேன் நாட்டிலே குடியிருந்தார்கள்; அங்கே நிலங்களைக் கையாட்சி செய்து, மிகவும் பலுகிப் பெருகினார்கள். 28 யாக்கோபு எகிப்து தேசத்திலே பதினேழு வருஷம் இருந்தான்; யாக்கோபுடைய ஆயுசு நாட்கள் நூற்றுநாற்பத்தேழு வருஷம். 29இஸ்ரவேல் மரணமடையும் காலம் சமீபித்தது. அப்பொழுது அவன் தன் குமாரனாகிய யோசேப்பை வரவழைத்து, அவனை நோக்கி: என்மேல் உனக்குத் தயவுண்டானால், உன் கையை என் தொடையின்கீழ் வைத்து என்மேல் பட்சமும் உண்மையுமுள்ளவனாயிரு; என்னை எகிப்திலே அடக்கம் பண்ணாதிருப்பாயாக. 30நான் என் பிதாக்களோடே படுத்துக்கொள்ளவேண்டும்; ஆகையால், நீ என்னை எகிப்திலிருந்து எடுத்துக்கொண்டுபோய், அவர்களை அடக்கம்பண்ணியிருக்கிற நிலத்திலே என்னையும் அடக்கம்பண்ணு என்றான். அதற்கு அவன்: உமது சொற்படி செய்வேன் என்றான். 31அப்பொழுது அவன்: எனக்கு ஆணையிட்டுக்கொடு என்றான்; அவனுக்கு ஆணையிட்டுக்கொடுத்தான். அப்பொழுது இஸ்ரவேல் கட்டிலின் தலைமாட்டிலே சாய்ந்து தொழுதுகொண்டான்.’
……………………
யாக்கோபு தான் இறந்த பிறகு கானான் தேசத்திலேயே அடக்கம் செய்யப்பட வேண்டும் என்று கேட்டுக்கொண்டதற்குப் பின்னால் சில காரணங்கள் இருந்ததாக நான் நினைக்கிறேன்.
முதலாவதாக, அவருக்கு இப்போது 147 வயதாகிறது. தான் எகிப்து தேசத்திலேயே இறந்துவிடுவோமோ என்ற அச்சம் அவருக்கு உண்டாகிறது; அது இப்போது அவருக்குத் தெளிவாகத் தெரிகிறது. இரண்டாவதாக, யோசேப்பு எகிப்தின் நிலங்கள் அனைத்தையும் பார்வோனுக்காக வாங்கிய விதம், தன் குடும்பத்தினர் எகிப்திலேயே வசதியாகத் தங்கிவிடுவார்களோ என்றும், மீண்டும் ஒருபோதும் கானான் தேசத்திற்குத் திரும்ப விரும்ப மாட்டார்களோ என்றும் அவரை நினைக்க வைக்கிறது. அவரது முதுமை, தான் விரைவில் இறந்துவிடுவோம் என்பதை அவருக்கு உறுதிப்படுத்தியது.
யாக்கோபுவின் இந்தக் கோரிக்கையை, கடவுள் தன் முன்னோர்களுக்குக் கொடுத்த வாக்குத்தத்தத்தின் (Covenant) மீது அவர் வைத்திருந்த விசுவாசத்தின் அடையாளமாக நாம் பார்க்க வேண்டும். நாம் வேதாகமம் முழுவதையும் படிக்கும்போது இது பலமுறை வருவதால், இதை நாம் கவனிப்பது அவசியம். பழைய ஏற்பாட்டின் நம்பிக்கை என்பது பூமியைச் சார்ந்த ஒரு நம்பிக்கையாகும்.
ஆபிரகாம் கானான் தேசத்திலேயே உயிர்த்தெழுப்பப்படுவார் என்று நம்பினார், அதனால் அங்கேயே அடக்கம் செய்யப்பட விரும்பினார். ஈசாக்கும் அதையே நம்பினார். இப்போது யாக்கோபும் அதே விசுவாசத்தைத்தான் வெளிப்படுத்துகிறார். பழைய ஏற்பாட்டின் நம்பிக்கை என்பது, திருச்சபையின் நித்திய வாசஸ்தலமான புதிய எருசலேம் நகரத்திற்குள் நுழைவதற்கோ அல்லது ஆகாயத்தில் கர்த்தரைச் சந்திக்க எடுத்துக்கொள்ளப்படுவதற்கோ உரியது அல்ல.
பழைய ஏற்பாட்டின் நம்பிக்கை என்பது, இந்தப் பூமியில் அமையப்போகும் கிறிஸ்துவின் அரசாட்சியைப் பற்றியது. அது நடக்கும்போது, இஸ்ரவேல் மக்களின் பெரிய எதிர்பார்ப்பு நிறைவேறும்; அந்த அரசாட்சிக்காக இந்த மக்கள் உயிர்த்தெழுப்பப்படுவார்கள். அதன் முதல் ஆயிரம் ஆண்டுகள் ஒரு சோதனைக் காலமாக இருக்கும், அதன்பிறகு அந்த நித்திய அரசாட்சி என்றென்றும் தொடரும்.
இதன் காரணமாகவே யாக்கோபு எகிப்தில் அடக்கம் செய்யப்பட விரும்பவில்லை. கடவுள் தமக்குக் கொடுத்த வாக்குத்தத்தத்தின் மீது அவருக்கு விசுவாசமோ அல்லது நம்பிக்கையோ இல்லையென்றால், அவர் எங்கே அடக்கம் செய்யப்பட்டால், அவருக்கு என்ன வித்தியாசம் இருக்கப்போகிறது?. எனவேதான் அவர் கானானில் அடக்கம் செய்யப்பட விரும்பினார்.
இன்றைய விசுவாசிகளுக்கு நாம் எங்கே அடக்கம் செய்யப்படுகிறோம் என்பதில் எந்த வித்தியாசமும் இல்லை. ‘இரகசிய வருகையின்’ (Rapture) போது, நாம் எங்கிருந்தாலும் உயிர்த்தெழுப்பப்படுவோம்; நம்முடைய உடல்கள் நம் ஆத்துமாக்களோடு ஒன்றிணையும். அதாவது, அந்த வருகைக்கு முன்பே நாம் இறந்திருந்தால் இது நடக்கும். ஒருவேளை நாம் உயிரோடு இருந்தால், நாம் மறுரூபமாக்கப்பட்டு ஆகாயத்தில் கர்த்தரைச் சந்திக்க மேகங்கள் மேல் எடுத்துக்கொள்ளப்படுவோம்.
எனவே, நாம் எகிப்திலோ, கானானிலோ, இலங்கையிலோ, இந்தியாவிலோ எங்கே அடக்கம் செய்யப்பட்டாலும் கவலையில்லை. இந்த எல்லா இடங்களிலும் “கிறிஸ்துவுக்குள்” மரித்தவர்களும், உயிரோடிருப்பவர்களும் எடுத்துக்கொள்ளப்படுவார்கள். நாம் விண்ணில் பாய்வதற்கு எந்த ஏவுதளத்திற்கும் போக வேண்டிய அவசியமில்லை. ஆம், நம்முடைய நம்பிக்கை என்பது ஒரு பரலோக நம்பிக்கை!
ஆனால், பழைய ஏற்பாட்டின் நம்பிக்கை என்பது பூமிக்குரிய நம்பிக்கை. யாக்கோபு தான் கானான் தேசத்திலேயே அடக்கம் செய்யப்பட வேண்டும் என்று விரும்புவது, உயிர்த்தெழுதலின் மீது அவர் கொண்டிருந்த விசுவாசத்திற்கு ஒரு சான்றாகும். வாக்குத்தத்தம் பண்ணப்பட்ட தேசத்தில் தான் மரித்தோரிலிருந்து உயிர்த்தெழுப்பப்படுவோம் என்று அவர் நம்புகிறார். யாக்கோபு இப்போது முழுமையான விசுவாசம் கொண்ட ஒரு மனிதராக மாறி வருகிறார்.
அருமையானவர்களே, நாமும் ஒரு காலத்தில் யாக்கோபை போல நம்முடைய திறமையை குறித்து பெருமையோடு வாழ்ந்திருக்கலாம். ஆனால் நாம் இருப்பதும் நடப்பதும் தேவனுடைய கிருபை என்பதை மறந்து போகாமல் எப்பொழுதும் மன தாழ்மை உள்ளவர்களாக நடந்து கொள்வோம்.
கர்த்தர் யோசேப்போடு இருந்ததால் தனக்கு கொடுக்கப்பட்ட பொறுப்பில் எல்லா இக்கட்டான நேரங்களிலும் சிறப்பாக செயல்பட்டதை பார்க்கிறோம். நமது வாழ்க்கையிலும் நம் பொறுப்புகளிலும் தேவனை சார்ந்து நம் வழிகளில் எல்லாம் அவரை நினைத்து அநேகருக்கு ஆசீர்வாதமாய் கர்த்தர் கிருபை செய்வாராக. ஆமென்.